И сице убо Божественни апостоли уставиша и узакониша. По сих же и Гангрии святии отцы Божественным Духом собрани, о всех купно, иже от святых апостол уставленных постех и иже потом узаконенных, со областию всякою в 18 правиле страшно отвещаше, глаголюще сице: аще кто от воздержащихся, кроме телесныя нужды, разгордится, и преданные посты во общине, и хранимые Церковью разрешает, якоже се тверду сущу в нем и совершену помыслу, да будет проклят. (Кормчая, лист 19)
И Аполлос великий во отцех, всех согрешений страшнейшее глаголет: яко соборные посты не возможно разрешати, кроме великия нужды. В среду бо Христос предан бысть, в пяток же распят бысть. Иже убо сия разрешаяй, сей предает Спаса и сраспинает. Такожде и Великий Афанасий глаголет: Разрешаяй среду и пяток сей распинает Господа, якоже иудеи, ибо в среду совет бысть на Него, а в пяток распяша и. разве точию в Богоявленских и в пентикостии, и в седмицы от церкви разрешенныя, такожде в праздники разрешаяй неповинен есть. (Кормчая, лист 59)
Цареградский же патриарх Никифор, в пятом правиле глаголет: яко от священника не постящегося среду и пяток, не достоит причаститися. (Номоканон, правило 215)