Об одеянии чуждом, то есть, иностранном

«…Ныне же, увы многоплачевнаго времени нашего, в неже заповедания Божественная пренебрегаются, правила и законоположения апостольская колеблются, постановления отеческая нарушаются, и вся древния предания и обычаи христианския разоряются, и уже православнии христиане, именующиися старообрядцы, ни на прещение Божественное, чрез пророка Софонию произнесенное*, ни на соборная и отеческая запрещения**, ни на церковное отлучение*** не взирают, но кийждо по своих похотех и вожделениих ходяще, все ни во что же вменяют, и обычаи иностранныя и одежды немецкия и французския усвояюще, глаголют: «Было бы у мене в сердце, а платье не вредит, каково бы оно ни было, ни спасет, ни погубит: понеже не в платье де вера заключается».

К таковым прилично есть апостольское оно рещи слово: «Сердцем убо веруется в правду, усты же исповедуется во спасение»****. Аще в сердцы у тебе есть страх Божий, то почто забыл еси прещение Божественное и от главы и до ногу облекся еси во иностранная одеяния, яже сам Бог запрети? Аще в сердцы у тебе есть рачение всего древняго, честнаго и благоговейнаго, то почто от вне облагаешися образом безстудия, и очесем честных досаждаеши? Аще в сердцы у тебе есть любление завещаний отеческих, то почто забываеши реченное: «Не прелагай предел вечных, яже положиша отцы твои?». Аще в сердцы у тебе есть старообрядчество, покажи е от дел своих…»

 

(Ксенос, «Кратчайшее изложение догматов и преданий, чинов же и обрядов, и обычаев древлеправославно-кафолическия Ветковския Церкве»).

 

* — Соф. 1, 8.

** — прп. Максим Грек, слово 140.

*** — 71-е правило 6-го Вселенскаго Собора.

**** — Рим. 10, 10.